※3月22日MAKE IN HONG KONG訪問※
訪問樂隊 : Tat Flip |
|
訪問日期 : 2002年3月22日 | 訪問地點 : Tat Flip Band 房 |
成員 : 嘉威 (vocal, guitar), 懷恩 (bass, 和音), 嘉榮 (drum, 和音) | |
威=嘉威 (vocal, guitar) | 榮=嘉榮 (drum, 和音) |
恩=懷恩 (bass, 和音) | T=Tracy (網主) |
T : Tat Flip 係嚮19... |
榮 : 94年定98年組成丫嘛.? |
T : 係呀..哈哈.... |
榮 : 咁樣呢..哈哈,Tat Flip 係嚮 98年,咁 94年呢就係我同嘉威同高豊三個人組成叫Endless |
T : 你地第一次出show 係幾時? |
威 : (現在陣容)應該係上年11月,商台舉辦的運音會. |
榮 : 有一隻CD 出左架,係 for 果次show 架.裡頭有一隻歌係後花園既歌,但果陣時玩(呢場show),Tat Flip自己都有玩既. |
T : 嘉威,嘉榮,你地係咪14 同16歲開始夾band 架? |
威 : 我係 (14歲) |
榮 : 我就其實未到16歲既,15歲左右啦 |
T : 咁你地屋企有無反對? |
榮 : 有 |
威 : 開頭有反對,話做乜鬼玩呀,浪費錢呀,又唔讀書呀,拎住結他唔知嚮度做咩呀∼(榮 : "都唔知唱乜鬼") 嘈喧吧閉咁樣囉.依家會好左好多囉,或者第一次睇你地參加比賽,開始拎到獎,果時就開始覺得 "咦,都唔係咁差架遮",咁就開始無左呢個感覺囉 |
T : 幾時開始支持呀? |
威 : 其實都有支持既,不過點都鬧下你先囉,浪費錢買支結他呀咁 |
T : 咁懷恩呢? |
恩 : 我屋企人好支持我架 |
T : 一路都好支持? |
恩 : 係呀 |
T : 點解你地會想夾band 既? |
威 : 因為中意囉 |
T : 因為中意夾band? |
榮 : 有D人中意音樂,咁可能會彈琴或者玩結他咁樣,但係無諗過夾band,咁我地就係中意夾band |
威 : 中意果種感覺,唔止一個人自己玩,(榮:係喇...)中意幾個一齊去玩 |
T : 咁懷恩係幾時開始夾 band 架? |
恩 : 幾年前啦~ 17, 18歲度喇 |
T : 咁你依家幾多歲呀.? |
恩 : 廿o靚啦 |
榮 : 其實佢仲有兩年就30 架喇.. 跟住退休(笑) |
恩 : 係啦,咁就拎D 工餘時間夾下band 啦,老來退休咪豐盛D囉.. (懷恩樣子認真地說)(笑) |
T : 你地嚮學校既成績會唔會跟唔到呀? |
榮 : 其實在於我地黎講.. 唔關事既 |
威 : 一向都跟唔到,唔關事既,唔會話影嚮到囉.即係如果佢話太沉迷就唔係咁好囉,荒廢晒D 學業,唔讀書,會唔會咁先?都得架,如果佢上堂都嚮度諗住點樣彈呀,咁樣禁 (用手扮禁結他手)呀,咁佢無廢荒到自己架,只不過中意既野唔同左之嘛,佢唔讀書,可能佢中意玩玩音樂.咁有少少影嚮既,只係睇佢點o者 |
T : 咁你地自己呢? |
威 : 無無無... 係讀唔到架喇 |
T : 咁你呢? (嘉榮) |
榮 : 下.. 其實影嚮唔到我架, 因為我都唔係點讀書架.. 哈哈...影嚮其實唔係音樂影嚮囉.讀書係影嚮唔到我既音樂架.. 哈哈... |
T : 懷恩係咪都係一路讀書一路夾架? |
恩 : 中四中五度囉就開始玩結他,唔係夾band,係自己玩o者 |
T : 你一開始玩結他架? |
恩 : 係呀,夾band 通常都係玩結他先 |
T : 幾時開始轉 bass 架? |
恩 : 轉bass 係... 加入Tat Flip 先開始轉bass 囉 |
T : 你地細妹有冇因為你地夾 band 就... (開始對音樂產生興趣) |
威 : 佢好細個果時就已經開始學琴 |
T : 咁有無夾band 呀? |
威 : 佢無,自己玩彈琴 |
恩 : 我阿妹好讀書果D 架,唔係好呢D 囉,聽歌都係流行曲囉 (榮 : 聽返Shine呀果D) 係囉,Shine 呀,果D 囉 |
T : 你地係咪以教人樂器做正職架? |
榮 : 其實一期期架喎... 即係依家開始就教人囉,咁就唔係話正唔正職既,只不過係可以話係幫到自己囉 (T : 收入方面?) 收入方面... 係呀 |
T : 咁你地之前都做過其他野架啦 (榮 : 係),咁你地公司D人知道你地夾band ,對你地既態度會唔會唔同左呀? |
威 : 即係公司知道我地夾band,態度會唔會唔同..? |
榮 : 其實最唔同既就係因為要出show 成日請假,咁佢對我地既態度就會因而轉變喇 |
威 : 哈哈.. 係咁鬧呀... 係囉,果時我做琴行都係呀,真係係咁比個老細鬧,因為突然間係咁請假,出show 呀,又訪問呀,其他既job 呀,咁就即刻要請假,咁就即刻鬧囉,你請個人返黎成日請假咁又鬧得o岩既... 哈哈.. |
T : 你地以前做過咩工呀? |
榮 : 都記唔到喇,我最近果份工都係嚮通利既 |
威 : 我最近係..琴行Nelson ,我以前做過麵包既學師咁囉 |
恩 : 我做空運果D 野,算係shipping 果D |
T : 你地會唔會諗住以夾 band 做你地既終身職業呀? |
威 : 可以的話緊係好啦,因為太中意音樂喇.中意既程度係不離不棄囉,即係盡量係睇下自己有無能力囉,玩到自己無能力既時候,即係玩到死呀, 哈哈... 玩到記唔到野呀~老人癡呆呀咁樣... 哈哈... 咁樣就玩唔到架喇 |
T : 哈哈... 即係出到聲都會繼續唱呀.. |
威 : 係囉.. |
榮 : 如果我唔風濕既話我都會繼續打鼓 |
T : 你地夾左咁耐band 呢,會唔會好多 fans 呀?即係女 fans咁.. |
威 : 唔... 我覺得耐左一定會有擁躉既,只不過係可能o岩o岩玩會無乜,不過唔緊要既.支持一定要,每一隊 band 都需要支持 |
榮 : 支持者係backup 到一隊band |
威 : 咩都好啦,即係支持佢,有就係好架喇,佢就會開心,最緊要大家開心啦 |
榮 : 我覺得應該形容為眼見到既... 即係睇得到既精神支持啦 |
T : 咁有無D 人係因為你地係Tat Flip既成員咁就中意你地 |
榮 : 我覺得唔可以咁概括咁去講囉 |
威 : 係,講唔到架,即係覺得中意就中意,唔中意就唔中意架啦.即係各花入各眼囉,咁佢可能中意你樣貌端正,中意你有才華,中意你好多好多野,或者中意你既音樂.或者由朋友識左你中意你,比你影嚮埋中意音樂添,咁都唔出奇,咁樣囉 |
T : 咁你地女朋友有冇夾band 架? (三人搖頭) |
威 : 朋友囉都係 |
T : 除左夾band 之外,你地有咩興趣呀? |
威 : 整麵包囉 |
榮 : 我興趣好多架,除左玩音樂之外,踢波呀,運動啦... 總之運動啦,玩game 呀咁囉,咩都得架我 |
恩 : 我除左運動,除左出汗既野我都中意玩架 (T & 榮 : o岩o岩掉轉) |
威 : 游水啦~o岩你 |
恩 : 游水唔得架我,游半個堂我唔得架 |
威 : 舒服丫嘛,唔洗出汗 |
恩 : 我耳仔又易入水呢~ 游完水之後我個頭都係乾架,我唔得架我 |
T : 可唔可以講下你地有咩理想呀? |
威 : 理想係將我地既音樂發揚光大囉,有人認同囉 |
榮 : 多D人聽到囉,即係多D人知道有樂隊咁囉 |
T : 即係多D 人知道有Tat Flip? |
威 : 不過如果其實有人支持都好好架喇 (T : 依家都好多人支持呀) 唔知呀..無統計過 |
T : 你呢(懷恩)?有咩理想呀? |
恩 : 理想... 係繼續咁樣落去,愈做愈好 |
T : 聽聞你地之前連續30場show 喎,係嘛? |
威 : 係呀,(榮 : 係呀)嚮大陸架,嚮深圳呀,廣州 |
T : 係連續30日架? |
榮 : 唔係~分開架 (威 : 一個禮拜兩日度啦)二三日啦,即係上去落返黎,上去落返黎 |
T : 哇... 都成半年喎... |
威 & 榮 : 去左三個月度啦 |
榮 : 咁就係做果個唱片個宣傳,咁因為我地隻碟嚮大陸都有得賣架,咁嚮上面做D show 希望可以更多人認識我地 |
T : 會唔會好累呀? |
榮 : 累呀,果個大o急呢,我平時出show 拉果個大o急呢,都係for 我四圍走架喳..哈哈.. |
T : 你地出過咁多show 呢,依家仲會唔會緊張呀? |
威 : 我覺得係睇到時個心情同人既反應,好多時都係.即係有D意外發生呢,可能突然間斷線呀,咁呢D就一定會令你緊張囉,或者唱完一隻歌之後台下無咩反應喎,咁你覺得D人..會有少少影嚮囉 |
T : 如果無呢D突發事件就無問題? |
榮 : 無問題~ |
威 : 我地通常都係做到自己做返自己囉,好似自己嚮 band 房果種感覺咁囉 |
T : 會唔會觀眾多就有D壓力呀? |
威 : 反而唔係,反而我覺得觀眾多少唔係問題,最緊係係有個反應比到你 |
榮 : 係呀... 其實呢我覺得作為表現者呢,最緊要係台下面既人有反應,去比果D (表演者) |
威 : 呢D 係支持同鼓勵... 不過唔緊要既,即係佢可能呆左o者,無乜野,我無乜所謂.有D特發性既事,好似阿榮斷鼓棍呀,無人可以幫到你手呀,又唔可以停喎,唔可以停晒咁架嘛,好老尷 |
T : 有冇試過邊場 show 係有呢D 事件發生呀? |
威 : 即係例如斷鼓棍果D 呀? (T : 係呀) |
榮 : 經常有發生呀,嚮呢度喎,即係嚮 band 房喎 |
威 : 黃克競果場第一次斷線囉,夾左咁多次... 出左咁多次 show,第一次斷線.即係我都預左架喇,預左會有掉線呢一日架喇... 哈..你明唔明呀.. 即係突發既斷,咁我都預備左一支後備既結他既~ (T : 係玩玩下斷呀?) 係玩玩下斷架.(T : 咁果時點算呀?) 咪唯有繼續頂埋先囉 |
T : 懷恩呢? |
恩 : 好難斷架喎~ bass 線咁粗 |
T : 唔係呀,我o岩o岩見到人地既留言真係話有人斷線呀.. |
恩 : 佢懶囉,佢唔換線囉. (威 : 結他線好幼架嘛,一鋤就好易斷架) |
T : 夾 band 帶比你地D咩呢? |
威 : 開心 (榮 : 開心),有滿足感.發表到一D野啦,發表到一D心裡面既或者見到呀,睇到呀,感覺到既野囉 |
榮 : 同埋自己可以做到一隻歌出黎呢,音樂好,歌又好啦,即係估唔到自己可以做到.估唔到可以同埋一大班人,或者我地D成員咁一齊可以做到囉.因為細個上音樂堂果時其實好無謂同好悶架,果陣唔識理解 (威 : 係囉,唔識理解,唔明白囉) 但係原來發覺,依家大個諗返以前,就算小學咁果D Miss彈琴咁樣都係好難 |
威 : 音樂係好玩架,可以抒發到你既感情出黎,你唔係彈隻cover 歌,即係單靠彈人地既歌,而係自己寫隻歌出黎,可以表達自己心入面既感覺果D呢,同埋自己整個 mood 出黎,自己感受返呢係好開心架.因為我地做音樂係好隨心架嘛,如果好唔開心咁做D音樂出黎就一定好唔開心,即係想盡量保留返自己每一個唔同level,唔同階段同 |
榮 : 同埋唔同心情呀,感覺呀咁樣 |
T : 即係好似日記咁樣?(點頭) |
T : 咁懷恩呢? |
恩 : 都係呢D野,因為始終一 group 人嘛,一隊 band |
T : 咁(夾 band) 令你地失去左D乜野呀? |
威 & 榮 : 時間 |
威 : 即係做唔到其他想做既野囉,變左一個人一日廿四小時係唔夠架.其實我覺得如果四十八小時會好D呀 |
榮 : 同埋犧牲左好多野啦,譬如自己入左行做左音樂咁樣,身邊有好多朋友...咁都無乜時間... |
威 : 即係冇咩時間同佢交際返,好似會冷落左D friend 呀 |
恩 : 我地D時間掉轉左呢,搵唔到佢地 |
榮 : 係囉,搵唔到.. |
威 : 佢做野可能朝九晚五,咁有時佢訓覺,果時我地可能先開始夾band ,變左可能聯絡時間小左,失去左好多野呀其實.時間可以係一個總括囉,即係譬如好多既 friend 呀,屋企人呀,譬如我想同屋企人飲餐茶咁,要抽一個一早好辛苦... |
T : 你地通常一個禮拜會夾幾耐架? |
榮 : 即係夾幾多次 band? (T : 係) 我地夾五晚 band 架 |
威 : 咁譬如六日都無去到街架,可能去一兩個鐘咁又要返去,因為我地又要教學生呢,做返D野咁 |
T : 你地既歌呢係咪主要反影社會既? |
榮 : 之前果隻碟係,依家新呢隻就比較講生活多D既,即係大家身邊隔離發生既野 |
T : 咁以前果隻碟既 message 呢,有冇人聽左之後會有所改變或者思考返呢? |
威 : 有,譬如上一隻碟既 "塞塞塞" 啦,係講教育制度既,會係講D Miss呀,阿 Sir 呀佢唔識去點教D學生呀,猛咁灌輸D新野入去,佢又唔知道D學生吸收唔到喎,咁佢又教教教教教,咁我地又迫於無奈咁去吸吸吸吸吸,咁但係有時未必好架嘛,咁但係都有好多人認同啦,因為有好多人都追唔上,而有呢個感覺 (T : 其他歌有冇呢?) "等級" 啦,"等級" 係講觀念呀,階層既,即係好多講窮等人呀,有錢人呀,中等人呀,即係講D 唔同既人,講D有錢人睇唔起D窮人呀,踩佢地呀咁樣果D囉 |
T : 你地點樣睇依家既 band 壇呀? |
威 : 依家既 band 壇....唔...... |
榮 : 唔批評喇~ (笑) |
T : 哈哈..... 好... 每到呢題都唔知點答既... |
榮 : 其實依家既 band 壇係無野既,只不過呢反而我會覺得依家既 show 多得濟 |
威 : 同埋我覺得係D 人易左出 show呀,可能夾左三個月咁(就有機會出show),變左... 其實都唔係一件唔好既事黎既... 但係只不過個感覺好亂囉,變左.... 我唔識講呀果種感覺,即係唔同左以前囉.我地以前出一場 show 係好難,我地無 show 出咁濟架,好少有人搵我地,所以我地跟住咪去參加比賽手囉經驗,因為真係無機會出架.咁我地參加比賽,點都好丫,我地參加比賽,點都上過台丫 |
榮 : 同埋我地以前睇 show 呢,睇親隊隊都好齊整,好勁.即係譬如睇Anodize 果陣,好早期喇果D呢,全部都好齊,你睇完之後真係會 "嘩" 咁囉,同埋果陣時既 show 呢係真係好做show 架, (威 : 好認真囉)係,好認真,你睇得到係好似你睇演唱會果種feel 架,但係依家無乜哩D feel 囉,玩或者睇既可能都無左呢種感覺喇,因為太多喇.即係多唔係唔好,有時多會睇得好多唔同既.... |
威 : 多到膩左囉,即係你食得多果樣野會厭呀,果D 感覺囉 |
榮 : 但係最近一次呢,嚮星期四我地做霆鋒果個獨樂樂果個演唱會呢 (威 : 咁佢就請左我地做嘉賓.有三隊,我地係其中一隊) 咁樣呢,個feel 呢好正架喎 |
威 : 佢觀眾比晒感覺你囉 ,有晒反應架,好熱烈架. |
榮 : 嗌到(耳朵)痛架,係震上黎架 |
T : 嚮邊度攪架? |
威 : 九龍灣展貿 |
T : 果次係咪好正呢個感覺 |
威 : 正,個感覺人海咁囉,好正.佢唔一定要跳既,拎住支螢光棒一齊揮呢都好正 |
榮 : 你係睇到好齊架~好正架,真架,你係睇到咁樣 (做出波浪型) |
T : 你地有冇諗過嚮第二度發展呀? |
威 & 榮 : 有架 |
威 : 無所謂,其實邊個地區都無所謂,即係邊個國家都唔緊要. |
榮 : 其實發展到咪去囉,其實我地係蒲公英黎架,哈哈... |
T : 諗住最理想係邊個地方呀? |
榮 : 最理想既地方就係可以比到一個最好既環境比我地去做我地既音樂囉 |
威 : 即係邊個地方都唔緊要既 (榮 : 係喇),就算保留返嚮香港都幾好既 |
榮 : 邊度都唔重要,最重要係做既過程要舒服,咁就滿足架喇 |
T : 咁呢度O唔OK呀(指band 房)? |
威 : OK架,不過無辦法,因為香港始終都係細,人少囉 (榮 : 發展空間唔大) 係囉,可能外國一小撮已經好大班人,己經好夠呀 |
T : 今次隻碟呢係你地一手一腳錄架啦,依家出晒,攪掂晒喇,辛苦完喇,你地有咩感覺呢? |
榮 : 好似生左個你咁囉 |
威 : 辛苦完感覺仲更加辛苦囉,因為你會再面對D更新既野架嘛,每一個階段都唔同架,面對既野都唔同呀,即係出左隻碟之後係鬆左一排,但之你仲要後點呢,你可能要出 show 喎,又要再綵排呀,要練習呀,總之好多野要顧啦.咁你唔係出左隻碟就得架嘛,你仲要諗返我仲有其他,仲要繼續要,即係好多時間你要舖排得好好囉,即係譬如我地已經籌備緊,已經諗緊做緊歌,預備出EP或者出大碟架喇 |
T : 己經諗緊? |
威 & 榮 : 係呀 |
T : 會唔會有個壓力,就算唔好過上一次都唔可以衰過? |
威 : 一定有架,因為我地對自己要求都幾高架,咁先有進步嘛.即係最起碼自己對自己有要求先啦,或者唔知既,比較唔到既,咁咪搵D比你叻既人去比較囉,step by step 咁去提高自己囉 |
T : 第二隻碟同第一隻比,你地覺得邊隻好D呀? |
榮 : 其實我覺得都無話,無得咁樣比架,我地自己亦唔會咁去比.因為無話一定架,嚮我地做第一隻既時候,我會覺得第一隻係最好既,隻隻歌都好中意.嚮我做第二隻碟既時候,我地第二隻碟一樣係隻隻歌都咁中意,即係嚮我地既角度,永遠都係好既,過到自己既先至會拎出黎,如果問我邊隻好,我會覺得隻隻都好.即係我唔想去覺得自己有咩唔好,要去做,因為嚮我地做果一刻既心情.. 我地既心血就係果度 |
T : 咁有冇中意邊一隻碟多D? 有無架? |
威 & 榮 :無 |
威 :如果上一隻碟揀一隻歌,我會揀 "找到" |
榮 : 我會揀 "你Jam 我都 Jam" |
恩 : 我以聽眾既身份覺得 "找到" 幾好,好闊 |
威 : 其他既歌有唔同 (榮 : 有唔同既感覺囉),因為我地都係架,我地唔希望全部歌都係同一種style 或者同一種感覺,如果唔係自己會好寡架. |
T : 咁今隻碟呢? |
威 : 今隻碟都係呀,十隻歌裡面D感覺全部都唔同架 |
T : 嚮整呢隻碟,到到拎去唱片公司度賣,有無D咩攪笑野呀? |
榮 : 攪笑....最攪笑係... 當你拎到去某D唱片公司既時候呢,佢有好多嘴臉架囉,即係你會見到,呀∼你都幾得意架喎果種感覺囉,有D又無回音啦,同你傾得好地地,咁原來唔o岩既,即係佢原來唔係咁想去幫你做一樣野,甚至反而係想你去幫返佢做一D野既.(威 :同埋會係幾難囉),嚮香港搵食係咁架喇,即係搵人合作就係咁架喇,由其係唱片公司呢就更加會有呢樣情況.咁所以我地今次搵人去幫我地做發行呀,做剩咁,咁揀左呢間就比較鬆動D囉,可以將我地既音樂推廣到香港以外既地方 (威 : 同埋自由度又高D啦,無乜限制架) 係呀,無限制過我地 |
威 : 即係唔會話簽左公司,你D歌就唔可以咁嘈呀,唔可以粗口,唔可以鬧人呀,唔可以剩呀,無左呢D野囉 |
T : 有無D.. |
榮 : 趣聞果D.. (T : 係喇) 趣聞其實無喎.因為嚮傾呢D野,去做果陣時其實係好認真架,出面D人佢唔同你講笑架,但最攪笑既我覺得始終都係佢地既嘴臉,呢個真係最好笑 |
T : 黎緊你地有咩大計? |
榮 : 大計就係開始做多D歌,然之後黎緊我地可能會出EP或者大碟 |
威 : 希望每一次比一次好囉.愈黎愈多人支持啦,愈多聽眾啦 |
T : 你地差唔多場場 show 都見到佢兩個喎(我身邊既兩位朋友仔..)? |
威 : 係呀,通常都係見到佢兩個 |
朋友A : 仲有架.. 仲有架... |
榮 : 仲有架? 唔知呀... 睇唔到.其實呢嚮我地角度,我地都知有人支持我地既,只係我地永遠都睇唔邊幾個,有邊D人,係唔知幾大班定幾細班人,唔知囉,即係通常見開果D咪會知道囉,但如果你話太多係睇唔到,因為我地出完show 我地都會執野呀.實知道有人支持既,實知道 |
T : 咁多場show 邊場最難忘呀? |
榮 : 最難忘... 最難忘果次呢係搖滾森林呀,太早喇,我都未訓... 我太夜訓喇 (威 : 訓唔到呀) 都無訓過 |
T : 幾多點架? |
威 : 一早7點... 07呀 |
榮 : 咁你07 去到果個.. (恩 : 粉嶺)去到果度喎 |
威 : 同埋一去到就落雨喇 |
T : 你地唔係扎營架咩? |
威 : 落住雨咁扎... 無營呀我地真係,跟住我都係問呀森美果D借之嘛 |
T : 懷恩都係果個? 三個都係? |
恩 : 係呀,都未試過咁早 |
榮 : 係呀,所以咪好難忘囉 |
~完~ |
資料來源: http://www.oocities.org/hk/madeinhkhk/ |
※∞HOME∞※※∞NEXT∞※※∞BACK TO INTERVIEWS∞※※∞TOP∞※ |